Florus, Diaconus Lugdunensis, saec. 9. med.
159. (1. ) Hymnus in sollemnitate sancti archangeli Michaelis.
160. (2. ) Hymnus in Natale sanctorum Iohannis et Pauli.
161. (3. ) Epigramma Psalmi vicesimi secundi.
162. (4. ) Epigramma Psalmi vicesimi sexti.
163. (5. ) Epigramma Psalmi vicesimi septimi.
164. (6. ) Epigramma Hymni Ananiae, Azariae, Misaelis, sanctorum trium puerorum.
Me pater omnipotens clementi iure gubernat, Non mihi dira fames, non ulla nocebit egestas. Assunt graminei colles et pascua laeta, Assunt et liquidi fontes et flumina larga. 5 His ego nutritus, his semper abunde refectus, Iustitiae rectos contendam carpere calles, Quos mihi dux mentis secreto lumine pandit, Ipsius ut nomen celebretur laude perenni. Illum ego corde sequens leti mortisque tenebras
10 Intrepido calcabo pede, mala nulla timebo. Meme quippe tuae, pie rex, correptio virgae Me baculus, pater alme, tuus firmatque regitque. Tu mihi delicias, tu mensam epulasque parasti, Quis satur invictas adipiscar pectore vires
15 Adversasque acies pulchro certamine vincam, Ut mihi post validos pugnae victricis agones Laetitiae largo caput aspergatur olivo Lucifluusque calix pleno me proluat haustu Servatusque tua cunctis pietate diebus
20 Sidereum Christi merear conscendere templum, Sub quo perpetuis vivam feliciter annis.