Acta Benedicti Pp. XVI 733

nexum inter Verbum et Sacramentum, sive in Ecclesiae actione pastorali sive

in theologica pervestigatione.188 Procul dubio « liturgia Verbi est elementum

decretorium in celebratione cuiusque sacramenti Ecclesiae »; 189 attamen in

praxi pastorali fideles non semper conscii sunt huius nexus nec unitatem

percipiunt inter gestum et verbum. « Est munus sacerdotum et diaconorum,

potissimum cum sacramenta administrent, in lucem exponere unitatem

quam Verbum et Sacramentum constituunt in Ecclesiae ministerio ».190

Etenim in necessitudine inter Verbum et gestum sacramentalem liturgice

ostenditur actio propria Dei in historia per indolem performativam ipsius

Verbi. Nam in historia salutis non datur disiunctio inter Dei dicta et facta;

ipse Sermo eius vivus et efficax praesentatur (cfr. Heb 4, 12), sicut ceterum

indicat ipsa significatio Hebraici effati dabar. Eodem modo in actione litur-

gica adsumus coram eius Verbo quod efficit ea quae dicit. Dum Dei populus

ducitur ad detegendum indolem performativam Verbi Dei in liturgia, iuvatur

etiam ad actionem Dei in historia salutis inque propria vita uniuscuiusque sui

membri percipiendam.

Verbum Dei et Eucharistia

54. Quod affirmatur in genere quoad nexum inter Verbum et Sacramen-

ta, penitius agnoscitur cum agimus de eucharistica celebratione. Ceterum,

intima coniunctio inter Verbum et Eucharistiam oritur e testimoniis Scrip-

turae (cfr. Io 6; Lc 24), comprobatur a Patribus Ecclesiae et iterum confir-

matur a Concilio Vaticano II.191 Hac in re cogitamus de magno sermone Iesu

super pane vitae in synagoga vici Capharnaum (cfr. Io 6, 22-69), in cuius

substrato habetur comparatio inter Moysen et Iesum, videlicet inter eum

188 Cfr. Benedictus XVI, Adhort. ap. postsynodalis Sacramentum caritatis (22 Februarii

2007), 44-45: AAS 99 (2007), 139-141. 189 Pontificia Commissio Biblica, L'interpretazione della Bibbia nella Chiesa (15 Aprilis 1993),

IV, C, 1: Ench. Vat., 13, n. 3123. 190 Ibid., III, B, 3: Ench. Vat., 13, n. 3056. 191 Cfr. Const. de sacra Liturgia Sacrosanctum Concilium, 48.51.56; Const. dogm. de divina

Revelatione Dei Verbum, 21.26; Decr. de activitate missionali Ecclesiae Ad gentes, 6.15; Decr. de

presbyterorum ministerio et vita Presbyterorum ordinis, 18; Decr. de accommodata renovatione

vitae religiosae Perfectae caritatis, 6. In magna Ecclesiae Traditione invenimus magni momenti

effata sicut: « Corpus Christi intellegitur etiam [...] Scriptura Dei »: Waltramus, De unitate Ec-

clesiae conservanda: 1, 14, ed. W. Schwenkenbecher, Hannoverae 1883, p. 33; « Porro, quia caro

Domini verus est cibus, et sanguis eius verus est potus, ... hoc solum habemus in praesenti

saeculo bonum, si vescamur carne eius et cruore potemur, non solum in mysterio, sed etiam in

Scripturarum lectione. Verus enim cibus et potus, qui ex verbo Dei sumitur, scientia Scriptura-

rum est »: S. Hieronymus, Commentarius in Ecclesiasten, 13: PL 23, 1092 A.